من مذكرات موظف حكومة

القصيدة دي بقى كاتباها من زمان -يمكن وانا في اعدادي-معتقدش ان اسلوبي اتغير كتير -للاسف

من مذكرات موظف حكومة

بخاف أنا من ضحكة تيجى وراها زعابيب أمشير
اول ما تخلص ضحكته ينقلب وشه لتكشير
يعنى يا ناس مضحكش وأقضى حياتي مشاوير
حاضر وايوة وجاى ..... مطلوب ده للتأ شير

ويا ريت أوامره مفهومة دى ف لغزها ولا الفوازير
والبيه مزاجه متقلب وحابب يعيش حياة تغيير
وعقلي احتار معاه لما قرب يطير
وبأدى شغلي وعلى كماله يصرخ في وشى يقول تقصير
وساعات يبش ويضحك لي ساعتها آخد أنا المحاذير
زعبوبة من زعابيبه جايه أنا من ده كله دقت كتير
وأهدي فيه وأقول معلش يا رب عديها على خير
وعلى نرفزته لكن طيب طيابة الامرا وهو أمير
أصيل وذوق وبتاع واجب والاصلا مش في زماننا كتير
ويوم ما أغيب عن شغلي يقول:لعل كان المانع خير
رئيسي وبيني وبينه عشرة مش بس مستخدم ومدير
خلاص عرفته وحفظته وعملت له قاموس تفسير
وقبل اى عاصفة تيجى بضرب لنفسي جرس تحذير
ومبقتش أخاف......

عرش العالم

أمريكا سيدة العالم ...ناظرة من فوق العرش
والعالم من تحت الأرجل...من يبكى ومن هش وبش

الباكي يبكى من جوع ...قطع أمعاءه ونهش
أو من سيف الظالم ماض... في رقاب المستضعف حش
الباكي راض بقليل...بيت مصنوع من قش
لا يقي من برد أو حر...لا يستر وان وشوش
ولقيمات جافة قليلة...لا تكفى عصفور في عش
والماء والملح ادام...قد حتى لا يجد المش

والهاش الباش المتحذلق...لا يأنف من غدر وغش
هو خادم سيدته مطيع...هو خادم من يملك قرش
هو سيف بتار في يدها...أو موسيقي يعزف مارش
كلب السيدة على الأرجح...هو نائم على انعم فرش

أيها المقهور قاوم ...مت بكرامة إن لم تعش
اعمل كي تكسب من عرقك... المال وأرغفة العيش
وافتح عينيك ولا تغفل...إن تغفل فأنت تغش
واشحذ سيفك بضمير...واجمع للباغين الجيش
حارب مع اهلك بضراوة...لا بجهل وغباء وطيش
وجاهد لبناء قلاع...بدلا من بيت هش
أمقاتل يصرخ من غضبة...أم جالس باك يجهش
هي كالطاووس على العرش ...اخذ نفس والريش نفش
إن تدفعها دفعة رجل ...تسقط ذات الصوت أجش
وتجلس أنت صاحب حق..._ظلم لزمن_فوق العرش

كن انت التغيير الذي تريده في العالم

العنوان ده كان مقولة لغاندي
طبعا فى فرق بين اللي هتقروه دلوقتي وبين قصيدة غير النضارة
الفرق إني هناك كنت متحمسة فعلا وهنا أنا بحمس نفسي
مش عارفة الإحساس ده هيوصلكوا ولا لأ؟

أعطي لحلمك ثباته زى الماهتما غاندي
قال قبل مماته حكمة تلاقيها عندي
لو نفسك يوم تلاقي العالم جنة وردي
يتغير للفضائل يصبح اخضر مندي

ابدأ لكن بنفسك تغييرك يا الأفندي

انا وانا ومن بينهما انا

علق البعض ممن قرأو البلوج على طفولة الموضوعات, ربما خجلوا ان يقولوا سطحيتها
أنا لا ألومهم على رأيهم هذا بل قد اتفق معهم ولكن بشكل جزئي لأن لكل إنسان حياته الخاصة التي تختلف عن حياة الآخرين رغم التشابه الظاهري بين الناس
ووجه الاختلاف هذا لا يمكن إهماله أبدا فهو يمثل الخبرات المكتسبة والأحداث المؤثرة فى حياة كل إنسان فما يؤثر فيّ بعمق قد لا يهم الآخرين على الإطلاق
والعكس أيضا فالحياة مليئة بما هو أهم وأعمق مما اكتب عنه ولكني لقلة تجاربي لم أمر بهذا الأهم والأعمق فكيف اعبر عنه وأنا لم استشعره ولم يؤثر فى حياتي بشكل أو بأخر
فمثلا المذاكرة هي الهم الأكبر والكابوس الأعظم الجاثم على صدري, فانا على الدوام مقصرة وتقصيري هذا يولد نوع من الضيق النفسي والصراع الدائم, قد يبدو الموضوع بسيطا للكثيرين (ايه يعنى مبتذاكرش طب ما تذاكر), لكنه بالنسبة لي معقد جدا(خصوصا أن بتمر على أوقات كتيرة ازهد فيها المذاكرة واخلد إلى الراحة ومشاهدة التليفزيون واستسلم لشعوري بالعجز عن تأدية ما هو مطلوب مني)
هذا ملخص ما كنت أود أن أقوله(تخيلوا بقى كان قد ايه)
المهم خلينا في القصيدة الجديدة وبرضه فيها ريحة المذاكرة(كنت كاتباها في فترة من فترات الاكتئاب)
من قرأ قصة هي ولانا من سلسة فانتازيا ل د. احمد خالد توفيق بالتأكيد يعرف عما أتكلم أما لمن لم يقرؤها:
ف (أنا هي ) فهي التي تعبر عن رغباتنا المضادة للمثالية وشهواتنا واعتبرها أنا سالبة
و(أنا العليا)هي الضمير والواجب والمثاليات وهى بمثابة المراقب والرادع لتصرفات الإنسان واعتبرها أنا موجبة
أما (أنا)تقدروا تقولوا المجموع الجبري بين( هي) و(العليا) وهي الصورة النهائية التي يظهر بها الإنسان إلى مجتمعه والصورة النهائية التي يظهر بها تفكيره وتصرفاته
ودي كانت مرة من المرات اللي دار فيها الصراع الاتى . أذاكر ولا أتفرج ع التليفزيون
أذاكر ولاّ أنام, أذاكر ولاّ أكمل القصيدة دي, احضر المحاضرة ولاّ أروح, أركز مع الدكتور ولاّ اسرح
fistula وعلى فكرة القصيدة دي كتبتها فى راوند النسا السنة دي أثناء شرح لدكتور لدرس ال

أنا وأنا ومن بينهما أنا
صوت الضمير لمّا يعّلي حسه يألم ... ولما يسكت يبقى عليه العوض
يصرخ.. اصرخ وأتمنى لو يكتم... ولما يسكت يحل بدني المرض
صوت الضمير مر لكن سكاته علقم... وبين البينين مقبول لكن على مضض
أنا بدي يصحى والطريق يسلم.... لكن بدون معاناة ويبقى هوّ الغرض

لما يسكت مش بيستسلم....في نفسي صاحي و ف ثنايا الروحي
يعني( أنا هي) تبقى بتتكلم... أما الضمير صاحي لكن مجروح
ينزف و نزفه مش مجرد الم...ده موت بطئ وغنا بصوت مبحوح
بكا ونواح بصوت خفيض النغم.... درس احتضار( للانا) بس مش مشروح


ولحظة ما يصحى الضمير( أنا هي) تتجنن...تخبط جدار( الانا) بالايدين والقدم
وتحس روحي بصداع وكآبة بتحزن... ده صراع حقيقي الوجود منذ القدم

أنا) هي المزيج بين( هي) و(العليا)... ميزن وكفتيه في خناقة وتشاحن
يا تطب( هي) يا تطب( أنا العليا)...وساعات نوادر( أنا) بينهم توازن
ولما تنجح( أنا) يا بختي يا هنايا... اسكن في بيت الرضا ف شارع السعادة كائن

مفارقات

مفارقات
شاف الولد صياد وشايل الشبك
قال الولد عينى عليك يا سمك
قال السمك يا ابنى ابوك صنعهالى
و ف صنعته ليها اجاد وحبك

كوني نفسك

فى احيان كثيرة يشعر الانسان بالحيره ويتساءل كثيرا عن طبيعة نفسه التي يجهلها

عذرا صديقتى العزيزة مها فحتى الان لا اجد نفسى التى يجب ان اكونها

لكنى اعدك واعد نفسى بانى ساجدها يوما ما.. حتما اجدها يوما ما

كوني نفسك
كوني نفسك يا فتاتي لا تكوني غيرها
كان ابلغ ما قيل من صديقتي مها
ظلت ابحث في الضمير عنك يا ذاتي العجيب
هو حقا شئ عسيران أجد نفسي _مثلها

لن أقول لا أجدها ولن ابكيها الدموع
فالنفس ليس طفلا ضائعا وسط الجموع
إنها تقبع هنالك خلف أسوار الضلوع
وما أنا بتاركة نفسي منى تضيع

نقبي عنها بعقلك وانبشي ب ها الأظافر
ليس سهلا تعلمين_كالذهب هي الضمائر
فالحي دون نفسه باق ابد الدهر حائر
كالغريب لا ينتمي إلى أي تلك العشائر

هذه اشرف عشيرة واليها انتمي
فالشرف في عروقي جار مجرى الدم
بل الى هذه _هي الأقوى_وأنا بها احتمى
بل إلى هذه_هي الأكرم_الكرم الحاتمي
يا غريب:الانتماء لأيهن لمغنم
لكن من أين جئت ؟هو السؤال الأعظم
إن أجبت فقد عثرت على عشيرتك الأم

اتخذ من كل خل كالنحلة بين الزهور
من كل زهرة رحيقها. ترشف أنواع العطور
ثم عد درجك إلى نفسك واثقا مستنير
فالنفس امنع حصن إن حلت خطب الأمور

كلهن جيدات ..كلهن لسن أنت
أين أنت؟ ابحثي واستعيني بطول صمت
وارض فيك بكل صفة وارض فيك بكل سمت
لعمرك لا تتشبهي أبدا.. وان استطعت.

انتبهوا ايها السادة

قد مس القلب شئ من جمود ...يا ايها الزمن البعيد .. الا تعيد ايامى الخاليات

فانتبهوا لانفسكم ايها السلدة وليرى كل منكم نفسه. من منكم مثلى؟

وادعوا الله ان يرفع عن كل قلب جموده وعن كل مظلوم ظلمه

انبهوا ايها الساده
أعيش في عالم وردى محاط بتلك الأطياف
لم ادر بما يجرى حولي في عالم مترامي الأطراف
لم ادر بنهر الدم ازداد من الضعفين إلى الأضعاف
لم اشعر أشلاء حولي عن وصفها تنأى الأوصاف
لم اشعر اطفالا ونساء تذبح كنعاج وخراف
لم أر في الماضي شجاعا دمر دبابة عسا ف
لم أر في الحاضر فارس أمام الدبابة لا يخاف
لم أر أشجارا زيتونة تقلع وتزرع أسياف
لم أر أوطانا تتهاوى وبقاعا عربية عجاف
لم أر إسلاما يتألم من زمن قد جاوز انياف
لم اشعر الم سليب الأرض من لص مجرم خطاف
لم اذرف إلا دمعات وكأني أبكى لجاري خصاف
وأكملت حياتي منتشيا بلهو ونجاحات لطاف
هو ذا حالي وكذا انتم إن شئت وشئتم إنصاف
لا نرى لا نسمع لا ندرك لا ننطق إلا الإسفاف
لا نملك إلا أحجارا هي قلب قد يدعى الإرهاف
فلندعو الله ليالينا لا نفتر أبدا إلحاف
أن يرفع عن موتى أحياء سم هو فينا زعاف
فتعود الروح لوادينا ونهب ثقالا وخفاف
لننصر إسلاما دينا وحياة ونقيم عقاف
ونشد رحالا حاجين من بعد زيارة وطواف
للحرم الثالث سعداء بخير نهاية ومطاف

نصائح هامة

النصايح دى كنت كاتباها برده لاختى

دى شوية نصايح خفيفة كده تنفع لاى حد بس يفكر نفسه بيها قبل الاكل مرتين فى اليوم لمدة اسبوعين

وابقوا ادعولي

نصائح هامة
إلى أختي الحبيبة ندى
انسي الهموم أو تناسى
دي مرارة افتكارها قاسى
وان ضايقتك ضايقيها
اجري وراها اطرديها
ولا ترمى ف يوم عليها
إن شفتيها التماسي

ضيفك إن كان تقيل
غتيت كان أو رزيل
مش طايقة منه كلمه
اديله ف وشه لكمه
وجودك زى عدمه
Excuse me ورايا غسيل

أختك دي جوه عينك
الله عليها يعينك
عامليها بالحنان...شليها جوه ضلوعك
شاوريلها بالبنان... تلاقيها واقفة طوعك
ودايما عايشة بينك

أمى الحبيبة

وبمناسبة انى بحب اختى اوىكتبت الكلمتين دول

حبيبتي ندى
ماما الحبيبة العزيزة ..أنا بشكرك
على هدية جبتيها لى من زمان
جبتيها حتى من قبل ما أتولد
من قبل ما اعرف يعنى ايه في حضنك أمان
غير الرعاية والمواهب
غير كل حب وكل الحنان
جبتيلى وردة من زهورك
جبتيلى قطف من بحر نورك
جبتيلى فرع من جمالك
جنينة من جنات حنانك
جبتيلى ظهر أتسند عليه في أيام الزمان
جبتيلى حب ماشى على رجلين
جبتيلى صبر له عينين وايدين
ياخدنى زى ماخدتينى في حضنة الدافى
يسقيني من نبع الحنان عسل موافي
ماما الحبيبة العزيزة أنا بشكرك
على حتة من اسمك وهبتيها لى
على شمعة في طريقي نورتيها لى
على حبيبتي ندى... رب يخليها لي

الأستاذة

كتبت هذه الكلمات فى مرة من المرات اللى كان نفسي ازعل فيها من اختي بس مقدرتش

عندها قدرة عجيبة عى ان تجعلنى ابتسم فى اشد لحظات ضيقى حتى ولو كانت هى السبب فى هذا الضيق

اختى الحبيبة: بحبك اوى

الأستاذة
تعرف كيف تضحكني ...تعرف كيف تبكيني
وتحتال على البسمة في أعماق تكويني
تعرف كيف تخرجها من حزني.....تداويني

هي من كان اغضبنى وهى من لها اغضب
إن لامتها كلماتي.....وان خاصمتها اتعب

ارهاق

ارهاق
يا ناس انا خلاص طهقت م الزحمه
الناس في كل مكان كتل بشريه متلاحمه
في مدرجاتنا اكوام ولاد وبنات
وف الاتوبيس انا بطلب الرحمه

ده انا حنيت للثانوى من تانى
للمدرسه من بيتنا امشيها فى ثوانى
وبرغم كل الزحمه والمعاناه
لسه الكلية عاجبانى

في المصيف

في المصيف
أخيرا أمام البحر ده اليوم اللي بتمناه
قدام جمال الموج وقفت فرحانة بلقاه
سمعت صوته في ودانى بيقوللى يا ولداه
مالك كده متسمرة واقفة حزينة يا فتاه
ضاع الحبيب منك أو غالى منك تاه
وجايه ترمى همومك في حضن موجي ودفاه
أو جايه تنعى حبك وتلعني اللي جفاه

عزيزي البحر لا تكن مغرورا
أنا بس بتأمل في خلق الله
لا بيا حزن ولا ضاع منى الحبيب أو تاه
هو جمالك اليومين دول للهموم مرساه
وللا معدليش حد اشكي له يا حول الله

رأي آخر

رأى أخر
سمعت مرة واحد بيقول بلا فلسطين
دى أول بلدهم فلس وآخرة بلدهم طين
أنا قلت ده كله سلف ولابد من رد دين
وان الأيام توالى وكلنا عارفين
قال تكونيش يا بنتي منتظره رجوع صلاح الدين
وللا أنت فاكره ف زماننا هتقوم هنا حطين
وان احنا من بعد ذله هنقوم كده واقفين
واللي السنين قتلته هيعود في غمضه عين

احنقتنى كلماته ..واغضبنى رأيه..وصدمني تفكيره ومعتقداته
فلم أرد في حينها ربما بعد حين

الحمار ده اسمه نونو

سعات الواحد وهو بيذاكر بتحصله حاجات غريبة جدا يعنى مثلا يفكر بشده فى الحمار... فعلا حاجة عجيبة!!!؟؟

الحمار ده اسمه نونو

جت لى فكرة مرة انى بالقلم ارسم حمار
كان في من شهر مايو فى بدايه النهار
واخترت له الاسم نونو ولا اعرف ليه الاختيار
وبالقلم سلمته قاعد لدوام الانتظار
بيبص ليافطه جنينته نظرات مليانه وقار
ولولا حبه عقل فيّا منعونى م الطيار
كنت خدته جريت لأمى فى انتشاء الانتصار
ده دليل لني بفن من عقل الطب اللى فار
بصوا للخط اللي ماشي بصوا للخط اللى دار
يا سلام عليك يا راسى فى حديقه جلبهار
اعذرونى يا جماعه بفرحتى بهذا الحمار
اصلها فرحه جديده فرحه يملؤها انبهار
اصل انا بايدي دي بايدي دي رسمت الحمار

تخاريف مذاكره
يا ألهى ما دهاني ما هذا الهبل اللي جاني
كل ده إعجاب بكائن في الحياة اسمه الحمار
دي سعادة الانتشال من على حافة همومي
اصل في بكره امتحان ياللا ذاكري فزى قومي
لا مؤاخذه ...صوت ضميري

يا سلام على دش دافى تكمل الحالة الجميلة

انتشاء والذهن صافى يا سلام لو كل ليلة

وساوس

إذا كنت ذا مبدأ فلتدعوا الله أن يثبتك على مبدأك فأي إنسان معرض في هذه الحياة إلي كم من الإغراءات التي تدعوه إلى التنازل عن واحدة من أفكاره أو مبادئه مقابل سعادة أو لذة واهية
وإذا ما بداء الإنسان سلسة التنازلات فانه لن يتوقف عنها حتى ينتهي كل أمل له في الوصول إلى الصورة المثالية التي كان يتمناها لنفسه.
وقديما قالوا : لا خير في لذة يتبعها ندم.

وساوس
أ و لست فتيا يا قلبي .... لم لا تتصرف كالفتيان
تحيا مزهوا مختالا .... بشباب وبصحة بنيان
وبقدرة على حب أعنف .... من حب الأم الولدان
لم لا تنطلق في الدنيا .... وتعيث سعادة في ها الوديان
وتكسر قيدا يحفظك .... وتخرج من تلك القيعان
وترى في الدنيا زينتها .... إذ تبدوا كأبهى بستان
هيا اتبعني سأدلك .... على زهر الدنيا الفتان
هيا وسأفتح لك بابا .... بل افتح كل البيبان
إن ساءك دربي سأعيدك .... بنفسي إلى اى مكان
لا تخشى من عندي شرا .... هيا يا صديقي الإنسان
لا تخشى شيئا صدقني .... اتبعني فأريك بيان
أجبان أنت أم عاجز .... هلم يا فتي الفتيان

اخرس وسواسا في عقلي .... ورجيما في كل زمان
أو أرجوا إن سرت في دربك .... توبة أو عودة ندمان
من يدرى من قبل العودة .... اجل فتطعم ديدان
وصحفي سوداء تقطر .... إثما وذنوب وعصيان
فالقلب إن جمح وأطلق .... ساقيه لريح الحيوان
واتبع هواه وشهواته .... وأغرقه بحر النسيان
انقلب إلى أهلي حزينا .... لم أنل إلا الخزيان
إذ أخشى من سوء مردي .... إن يوم عصيت الرحمن
فاخسر دنيا وزينتها .... والآخرة و كل أمان
أما عن بستان الدنيا .... لي خير منه بل وجنان
لم يرها قبلي إنسانا .... أو حتى أطلعها جان
إن صنت القلب وحفظته .... هي ملكي وهبنيها المنان
فقوة قلبي في حفظه .... مع كل القدرة على الإتيان

يوم الامتحان

يوم الامتحان
في الامتحان يوم الامتحان .... يوم الكرامة أو الامتهان
داخل فارد صدرك ناوى .... أو مخضوض خايف وجبان
خارج منصور مرفوع الراس .... أو مخذول وحزين متهان
في الامتحان يوم الامتحان .... تكرم يا سيدي أو راح تهان

جوه اللجنة معركة قايدة .... والاستعداد بردك له فايدة
عقلك قلمك هم سلاحك.... والتدريب أسئلة متزايدة
وورق ابيض جنبك لازم.... للتسميع واهى مسالة سايدة
تفهم تحفظ كله تمام.... يبقى استعد للامتحان

تدخل بقى ع المعركة حامى.... تخط جوابك بكل تسامى
ورقة أجوبتك ممتازة .... وللدرجات دي اجدع صايدة
:تخرج بقى تتحفنا بقولك:
ورقة أسئلة ايه ومخاوف.... الامتحان أسهل من ها يف
دة لو أنت مذاكر بس يا حلو.... مش زى حالاتي كده واد خايف

في الامتحان يوم الامتحان .... يوم الكرامة أو الامتهان
داخل فارد صدرك ناوى.... أو مخضوض خايف وجبان

رسالة الى أمي

كانت تلك القصيدة اول ما كتبت واول ما عرفت من خلالها انى استطيع ان اصوغ بقلمى كلمات قد تعجب الاخرين وتعبر عما قد لا استطيع قوله_اذ كنت لا اثق في كل ما كتبت قبلهاولا اعتبره موهبة على الاطلاق بل مجرد كتابات طفولية_....كانت اعتذار لأمي عن واحد من تلك الاخطاء التى لا اكف عن ارتكابها.. كان ذلك فى اولى ثانوي والحق يقا ل فلقد دهشت من مدى تاثير تلك القصيدةعلىامي فقد تحول الغضب الى رضا وسماح والحزن الى فرحةو اعتزاز

رسالة إلى أمي
خطاءة أنا في حقك أمي
وحزن قلبك من اجل اخطاءي ابكانى
ولتسالى نجوم السماء ولتبحثى في وجداني
أبكى....
وهل يمحو البكاء ألامك والامى
آسفة.....
كلمة خاوية لا تحمل ما ابغي من معاني
وبربي وبربك غمى لا تحزني
فأنت البهجة لقلبي وقلوب خلاني
ورضاؤك أنت يا غمى هو غاية امالى
فلو غضبت على مرة فيا تعسي فتاة وما اشقانى
ولو كنت حمقاء يا امى
ولو كنت انا الجاني
فأنت الصدر الرحب والقلب الذي يغفر كل اثامى
وأنت الورد الذي لا ينضب ومنبع كل احلامى
وأنت زهرة ربيع عمري وريحانة ايامى
وأنت قيثارة ليلى ومسمع كل الحاني
وأنت الحب يغمرني وروحي وايمانى
وسوط عذاب لمن يبغى يوما ايلامى
وشمس نهاري الوضاءة وبدر تمام الليالي
ولو بت أصفك يا امى
لن تكفى صفات الكون ما فيك من المحاسن والخلال
فأنت أنت العطاء الحاني
يا امى

مطلوب دكاترة

تجربه مر بيها كتير مننا.. انك تروح تقعد فى اوضة الدرس من الساعة 9 وتستنى الدكتور وتستنى وتستنى وتستنى.... وانت وحظك بقىيا ييجى يا ميجيش

وتجلت الصورة دى اوى فى وحدة 29 جراحة الدور التانى على ايدك اليمين

مطلوب دكاترة
راوند الجراحة تاعبنى غلبني اه يانى
اللي نقوله نعيده ونزيده من تانى
عايزين دكاترة يشرحولنا لوجه الله
من غلبي بثيت شكوتى للقاصى والداني

يبدأ قانوني الصبح من بدري
8 لو جت في بيتنا أترعب واجري
اصل الطريق طويل للقصر من بيتنا
و9 أكون هناك عمري ما أكون واخري

ولما لقيت انه مفيش فايدة
لا دكتور يعبر ولا نايب ولا نايبة
قررت اتاخر واعمل روحى سعيدة
ومن حسرتى عليها من جوة ناري قايدة

أتحسر يعنى عليها وللا متحسرش
وكل طالب أشوفه حريص ميتاخرش
والدوك أيا كان حالف ليتأخر
ييجي11و12 يقول هامشي

أوف يا جماعة الزحمة دي عجيبة
حجة ضعيفة غريبة ومريبة
من مصر يا دكتور بلدنا وللا منين؟؟؟
ما إحنا في معادنا بنيجى وبيوتنا دي بعيدة

مش معنى انك يا دكتور واحد كبير وعظيم
انك تنسى التزامك بالطلبة المظاليم
يعنى افتكر مرة وتعالى في معادك
واكسب ثواب فينا واعتبرنا يتيم

عايزين دكاترة يشرحولنا بحب
مش معنى إننا رابعة يعني هب اقلب
ويا ريت كمان تيجيبوا لنا العيانين
ومتسيبوناش يا دوكتورز في غياهب الجب

أو سيبونا نرحل من هنا وخدوا غيابنا
نشوف حالنا بعيد وارجموا عذابنا
يمكن نحصل كلمتين أو نشوف عيان
اهى حاجة تنفع واقبلوا عتابنا

في وحدات الجراحة التانية لرابعة بيشرحوا
دكاترة تفرح والطلبة يشرِحوا
مش زينا الجهل سابقنا
و ف يوم هيبقوا دكاترة يفرحوا

أنا عارفه إن المذلة في الشكوى لغير الله
لكن حالتنا صعبة خالص يا حول الله
ويمكن يسمعنا واحد قوم ضميره يصحى
ويشرحلنا بذمة ويراعى فينا الله

حكاية الارنب والارنوب

الأرنب و أخوه الارنوب
الأرنب وأخوه الارنوب بيحدفوا بعض بالطوب
واللي يتعور منهم يكون هو المغلوب
والتعلب التعلوب مبسوط قوى و مطروب
عمال يشجع فيهم وهو ده المطلوب
التعلب:
خد لك يا أرنب طوبة وخد زلطة يا ارنوب
واللي هيكسب منكم هاسقيه أنا الخروب

أرنب تعب قوى خالص ع الأرض راح مقلوب
ارنوب قال من تعبه: الضرب مش أسلوب
ما تيللا إحنا الجوز عن ضرب بعض نتوب
هات ايدك.خد ايدى يا اخويا ارنوبى يا حبوب

تعلب واقف سامعهم م الرعب قام منصوب
يا نهار مش زى بعضه هيتصالح المضروب
علي أخوه اللي ضربه ويرجعوا المسلوب
وده لا يمكن أبدا طول ما أنا في الشر بدوب
ها اعمل مكيدة أخيرة أنا أ صلى واد لهلوب

تعلب للارنوب:
ارنوب افندى تعالى أنا عندي لك مكتوب
باعته الأرانب تنصبك ملك قوى وأروب

تعلب للأرنب:
الحق يا أرنب بك حصل عليك ملعوب
ارنوب ملك عليك ع الجذع ده منصوب
لازم يهون عليك ضميره صار معطوب
خد زلطة مني ليك وهاته هنا مصلوب

تعلب لارنوب:
يا خبر ارنوب جلا لتك واقف تسقى المشروب
وأرنب مش فرحان بك قاعد هناك موروب
وشايل زلطة في ايده. واقع أكيد مكروب
خد مني طوب يا جلالتك ده للدفاع مجلوب
واضرب أخوك الأرنب ده عقله صار مجذوب

الأرنب واخوه الارنوب بيحدفوا تانى بالطوب
والاثنين مغلوبين والبيت هوّ المخروب
اصل الخناقة يا ساده خلاف في الراى يا دوب
مين اللى يرجع فيهم الخس المنهوب
واللي كان سارقهم تعلوبة بن التعلوب

الضعف

الضعف
آه يابنى ادم يا اللى الضعف من شيمتك
وآه من قوتك اللى تزيد قيمتك
آه لو تعرف كم انت هش وضعيف
بدل الدموع راح تبكى الدم من خيبتك

لو بس تقدر ف يوم تنهى جبروتك
وتفتكر لحظة عياك .انا مش بقول موتك
وتشوف فى نفسك انسان مريض وطريح
وفى فرشتك عاجز تجيب قوتك

لو بس تعرف ان المرض يكسر
فيروس حقير في الصحة بيطير
وبكتيريا متعرف بتيجى منين
ومناعة مجنونة فيك انت بتدمر

وورم ببيهرى البدن حميد وخبيث
بنستجير منّه .نصرخ نقول يا مغيث
ولا تعرف بييجى ازاى ولا فين
يدخل عليك وفدخلته ابليس

واعضاء بتصرخ :لأ كفايه حرام
م الهلك فيّا ده انا م العمل م بنام
والجسم يتوجع فى صمت لحين
تقتله الشكوى او تقتله الاورام

ساعتها بس هتعرف؛قوتك محدودة
وتبطل تعادى الناس يا بو عضلة مفرودة
شوف انت قدرت روحك بكام واحد
وفى الاخر هتتقدر بكام دوده

لو بس تعرف كم انت هش وضعيف
ضعيف فى بطن الوالده حته لحم
ضعيف فى لفتك محتاج الام
ضعيف فى حبوتك تتشال تنضم
ف مراهقتك ضعيف. يتحاجى عليك تتلم
وف عنفوانك وصحتك برده ضعيف قدام الهم
وقدام شيطان ورجيم لسه ضعيف .جاك غم
ولم تمرض ضعيف قدام عذاب الالم

لو بس تعرف كم انت هش وضعيف
تعقل تفكر قبل وقت الندم

اه يا بنى ادم يا اللى الضعف من شيمتك
كانت ايه بدايتك وازاى حياتك ونهايتك
لو بس تعرف كم انت هش وضعيف
بدل الدموع راح تبكى الدم من خيبتك

المفاجأة الثقيلة

المفاجأة الثقيلة
صحيت من نومى على دقه على بابى
لقيت بالباب كل اصحابى واحبابى
واقفين زناهير والفرحه في وشوشهم
آل ايه النهارده يوافق يوم ميلادي


وقفت مذهول .انا مش ممكن اتصور
ان انتو ف الحساب منى طلعتو اشطر
ازاى ده يوم ميلادى وانا معرفش
ده انا بعد له من قبلها باشهر

ده حتى النهارده ولا شهرى ولا يومى
يعنى خلاص ع الفاضى قومتونى من نومى
ايه يا ترى سبب الزياره ؟ مفاجأة ؟
ولو غلسه يا ناس اوعو تلومونى

زقونى ودخلوا على جوه وقالو الشاى
وقلت حاضر .ايوه زمانه جاى
وقلت ياللا اشربوا شايكم وفارقونى
ومع السلامه ياللا وبقى باىباى


قالوا ازاى متجيش .ميصحش ده انت ابو الذوق
وبرزقنا يا شيخ راح تكون مرزوق
وهنفطر ونتغدى على حسابك
ده انت يا راجل للكرم مخلوق

شربوا الشاى وفطروا كمان
وقالو محلى ليالى زمان
فطار وغدا وعشا عند اخونا
و ف سرى قلت:ماهو بالمجان

اتارى الفلس صابهم واحد ورا واحد
ومنتظرين الفرج من الاحد الواحد
وقالو على ما الفرج ييجي
نعيش مع اخونا بن عبد الواحد

شردت حزين ومهموم وبفكر
على خزين البيت م السمنه والسكر
وقلت يا ريت كنت حجيت وللا هجيت
او حتى شديت الرحال على الازهر

كانو جم لقوا البيت فاضي
ونجيت انا من طوفانهم الاغبر
لكن فات الأوان
وجانى البيت معسكر م المغول اخطر
ده انا عارفهم واحد ورا واحد
مش اصحابى
لكن هييجو ع اليابس وع الأخضر
ولحد يوم رحيلهم ها فضل أتحسر
يا ميت خسارة على خزين البيت م السمنه والسكر

غير النضارة

قرأت مرة كتيب عنوانه عايش وللا حىكان يتحدث عن ان الانسان يجب ان تكون نظرتة للحياة ولحياتة بصفه خاصة متفائلةوان تكون لديه رؤية مستقبلية واضحة وبمقدار تلك الرؤية يحقق الانسان اهدافه.

• what you see is what you get.
• you never achieve more than your vision.

غير النضارة
نضارتك القد يمه و قزازها اللي انكسر
ارميها ومن جديد اعمل قياس نظر
في مرايتك بالجديدة يمكن تشوف قمر
أو غابة واسعة ضلمة مليانة بالشجر
وبعد ما شفت نفسك شوف تانى البشر
بنظرة تانية خالص وأسلوب مبتكر
و دور ع الحقيق و الحق اللي اندثر
و لما توصل قولي و ابقى ادينى خبر
هتكون اللي أنت شايفه ..فكون بعيد النظر
هتكون اللي أنت شايفه..فكون بعيد النظر

أول لجنة شفوى

أول مرة

مشفتش مره فار مبلول

واقف خايف قدام غول
عمّال يتكور وبيصغر

لأصغر من حبايه فول

عمرك شفت الفرخة الدايخة

قبل الدبح بتجرى وخايفة
بريش منفوش والصوت مبحوح

وللا كفاية أمثله بايخة

لو شفت الأمثلة دي كاملة

يبقى أكيد شفتني وأنا داخله
لجنه شفوي البيو..عارفينها..

بدماغ متضاربة ومتداخلة

جوة اللجنة تلات براويز

لأساتذة إنما يا حفيظ
واحد منهم عشرة يساوى
والتانى ليّا كان ناوى

والتالت لزوم البهاريز

سال الأول قولي يا بنتي

الفيل بيساوى كام نملة
رد التانى وقال له استني

ده أنا عندي الاسئله بالجملة
والتالت قال خدي دي منى

في الصحرا كام حبه رمله

رحت بلون وجيت بلون

ولا بعرفش الميم من النون
دق الخطر أجراسه ف راسي

أجراس ايه قول دق الهون

كنت حاسة كانى الجون

قدام لعيبه كل الكون
ده بيباصى ودة بيشوط

وأنا بصرخ وطالبه العون

دى كانت اول مره ف عمرى

ادخل فيها لجنه شفوي
مكنتش عارفه أنا خارجه ازاى

وازاى روحت لبيت اهلى

أول مرة

بسم الله الرحمن الرحيم

دى اول مرة يكون لي بلوج خاص بى واول مرة احاول ان الكلام الل باكتبه يقرأ عل نطاق واسع شوية

انا باكتب شعر عاميه وفصحى. العامى طبعا حالته احسن بكتير. أما شعرالفصحى على الرغم من تعثره بسبب جهلى بأوزان الشعرالا انه فى معظم الاحيان لا يخلو من الفكرة الجيدة والعبارات المعبرة(وده رأى ناس غير متخصصين فى اللغة و الشعر

وطبعا ده رأيى انا كمان .يمكن لأن القرد فى عين امه...؟ مش عارفه

على العموم الهدف من نشر الشعر بتاعىهو الحصول على رأى اهل الشعر فيه من خلال رأى صريح ونقد بناءلما اكتبه فهو فى كل الاحوال سيعطينى دفعة قوية للتعلم ودراسة الشعر ولو بصورة محدودة

طبعا أحب اعرف رأيكم لأنه أكيد هيكون مفيد ليا

اول قصيدة هانشرها هى قصيدة أول مرة

كتبتها فى تانية كلية وانا بافتكر اول مرة فى حياتى ادخل امتحان شفوى كان فى مادة الكيمياء الحيوية