حدث بالفعل

كل اللى اقدر اقوله ان الحكاية دى حصلت فعلا فى اروقة المستشفى

اسيبكم بقى تقروها

امبارح كنت نازلة فى الاصل مبسوطة

من بعد ساعة ونص..ضحك وكلام كبير
ع السلم قوم سمعت ..في ودانى زغروطة
رفعت راسي ابص ..أنا و اصحابى الكتير

وكان قدامنا واحدة..من طينة بلادي
من النوع اللي يصحا.. من النوم يقول يا هادى

سمعت معانا الرنة..فقالت بابتسامة
سامعينها يا حبايبى ..أتمنوا لها السلامة

ويا حبيبتي راح أساعدك..من غير حتى سؤال
وافرح يا اختى لفرحك..في كل ظرف وحال
متستغربوش يا بناتي..ده الفرح عال العال
وحدعيلكم يوماتى.. بكل خير آت..
وبولاد الحلال

وثانية واحدة مرت.. زغروطة تانية رنت
على دقة قلبي رقصت..م الفرحة احلامى

الدعوة كانت حلوة ..والأحلى الابتسامة
ونظرة عينها ليا..وأنا وسط ناس ياما

حسيت يومها كانى ..بالفرحة ملطوطة
مانا أصلا كنت نازلة..في الأصل مبسوطة
وزمان قالو الكبار ..تضحك لك الدنيا
لو بس أنت تضحك..مشروطة محطوطة

من وحى الاغنية

كانت امى تغنى لى دوما فى طفولتى اغنية كان فى فراشة صغنططة لنيللى

اتذكر صوتها الهادئ الناعم وهى تدندن لى الاغنية وتتوقف دوما عند مقطع معين فيها

كنت دايما اقولها ..كملى الاغنية وهى دايما تقول انا نسيتها ..انا حافظة لحد كده بس )

دائما ما تمنيت ان تتم امى لى الاغنية

كتبت تلك على الابيات وانا ادندن لحن اغنية الفراشة (بعد ان حفظتها كاملة) كتبتها فى الطريق اثناء ذهابى للكلية واكملتها فى راوند

النسا..

كتبتها ولا يزال لحن اغنية الفراشة فى راسى حتى انتهيت منها..فاخذت ادندن اغنيتى الجديدة بنفس اللحن القديم وقد امتلا قلبى سعادة

من وحي أغنية الفراشة ل نيللي

طارت فراشة من على ورق الشجر
رسي جناحها على صخرة فوق القمر
قالت له: ليه من قريب مش جميل
قال عشان أنا خالي م البشر

ليه يا قمر يا واقف وحيد
شكلك جميل أوى من بعيد
بتسر عين الناظرين
و تخلى المتفرج سعيد

بس يا خسارة يا قمر
قلبك طلع مليان حجر
ولا يمكن يوم يبقى خضار
لو 100 سنة نزل المطر

رجعت فراشتنا للجنينة
فرحانة وأبدا مش حزينة
رجعت وسط أصحابها الكتير
وردات بلدي وعصافير زينة

يا اللي ملكش أصحاب كتار
غلطوا لما قالو الكبار
متكتروش من الصحاب
لأ دفي قلبك بالعمار

يا بحر

يا بحر


يا بحر يا اللي تحب الزيادة
أنا عايزة أعوم فيك كمان وكمان
مش عايزة ازهق م الاستزادة
من كنوزك طول الزمان

أنا عايزاك أنت تبقى وطني
اللي معايا في كل مكان
انا عايزاك أنت تبقى واحتي
تبقى راحتي في كل أوان

يا بحر يا اللى تحب الزيادة
أنا عايزة أعوم فيك كمان وكمان

يا بحر يا اللي انت الصديق
ورفيق دربي وبردة الطريق
انا سابحة فيك ومعاك وفى قلبك
مهما اشتد بي الضيق

لما الشمس تغيم نوبة
والريح هتعلى لنا الموجة
نهرب يا بحر الى الاعماق
لحد ما تعدى الهوجة

باسبح فيك يا بحر بقوة
مرة تقل ومرة تزيد
ومهما هاتعب بردة هاكمل
وباقول تانى ولسه حأعيد

مش عايزة أزهق م الاستزادة
يا بحر يا اللى انت صديقي
من موجك خدت الزوادة
يا رفيق دربي وبردو طريقي

زهر العمر

زهر العمر

تراني حائرة ابكي...فتسأل هل للزهر عيون

تمتلأ بالدمع وتثقل على أجفانه هموم الكون

فتجافى النوم ليال وفى قلب الصخب تعيش سكون

اترانى احلم أم اهذي أم مس الأفكار جنون
...................

إنا زهر وأنت البستاني لسؤالك جد ممنون

فبسؤال المخلوق أخاه عن حاله الحزن يهون

لا حلم ولا هذي هذا بل هذا اعقل ما يكون

ف كالبشر امتلك عيونا واعيش في ايامى سنون

أرى في الطير الحرية وفي نفس الإنسان سجون

وظلام وضياع أزلي في وسوسة وسوء ظنون

آخى البستاني نعم ابكي .إنا زهر العمر المغبون

واحتار في البشر الأسمى كيف لعهد الله يخون

فلم يعرف كيف يعني بأوراقي وكيف يصون

ويقسو علي ولا يعرف من بالنسبة إليه أكون

أنا منه ولكن لا يدرك لذا يمتلأ القلب شجون

ففي ضرري يمتلك السبل ودروبا وطرق وفنون

ضيع أوراقي ضيعني ويظن أن يحيا بدون

أوراق الزهرة الذابلة. يا له من ساذج مأفون

أتساءل حقا في حيرة تسكن مابين الجفون

اظلم للنفس وبغى كبغي الظالم فرعون

أم للجهل جذور في ارضي وله في سماي مئات غصون

أم ضعف وعجز وتبلد مكروه أبدا ملعون

أعجب للإنسان وعجبي كيف يجهل من يكون

اعذرني إن طال كلامي لكن هل وصل المضمون

فالزهرة ذابلة يوما لم يستعجله المجنون..!!

كلام فشارين

ساعات كده الواحد بيتخنق من كليته ودراسته شويه وبيزهق منهم

دى مرة من المرات..بس كنت الظاهر سعيدة شوية فعبرت عن زهقى بالفشراية دى

كلام فشارين
يا كلية سعيدة.... مليانة بالسعادة
لو ينعاد عمري تانى.....فيكي تكون الإعادة
يا مهنية حياتي .....شايفاها وردى وردى
و بغني لك ليلاتي.... أجمل أغنية عندي
يا كلية سعيدة مليانة بالسعادة

شايفة الحياة وجمالها.... جوة عيون عيانينك
والراحة في المعاملة.... بين طلابها وبينك
وفيكى الخير بيسرى.... تقولش ده هو نيلك
والفرحة في قصر عيني .....مش في قصر عينك!!!!

يا عشرة عمر غالى.... سنين طوال عراض
ولا عمري زهقت منك.... ولا حسيت بامتعاض
علمتينى المثابرة..... والصبر منى فاض
كفّى كل الخلايق ....وبقيت بنك اقتراض

يا كلية سعيدة..... مليانة بالسعادة
لو ينعاد عمري تانى..... فيكى تكون الإعادة
يا مهنية حياتي.... شايفاها وردى وردى
وبغني لك ليلاتي..... أجمل أغنية عندي
يا كلية سعيدة مليانة بالسعادة

يوم العيد

يااااه..ايام الطفولة دى كانت اياااام ..هيييييه زمن...سعادة بلا مسئوليات..فرح يلا ثمن..راحة بلا تعب..حب بلا مقابل

وكأن الطفولة هى جنة الله لعباده فى الارض

يوم العيد
كنت اصحي من نومي
أجرى على هدومى
وأقول يا ندى قومي
اسمعي التكبير

وأجرى على تيتا
وأقول بصى الهدوم
جديدة في جديدة
ده أول ما أقوم م النوم

وانزل لماما تفطرني
ولبابا يدينى عيديه
وأقولها تسشورنى
والعيد يبان عليا

وأجرى على اعمامى
وأقول صباح الخير
يقولوا ايه الشياكه
وأقول: من ده كتير
واخدلى منهم عيديه

شكرا يا عمو مرسى يا طنط
ايه كل ده وأنط نط

واخد فلوسى وأجرى جرى ع المراجيح
ويبصوا ميلاقونيش ويقولوا زي الريح
ولا كان في دماغي ذكر ولا تسابيح
ده أنا كنت طفلة والطفولة تفاريح

ولا ليّا دعوة بضيافة ولا تنضيف
ولا حلبه ولاحمص ولا ترمس لزوم الضيف
وكنت شايفه حياتي بالوانات الطيف
ده زمان وأنا كنت طفلة كان عيدي دمه خفيف
دلوقتى برضه كويس بس اختلاف مش طفيف
في طبيعة العيد عندي و................
زمان يوم العيد

خواطر

لمن أبوح بهمي وبمن احتمى
ومن أسعى إليها وفى حضنها ارتمى
ومن تدع لي في صلاتها قائلة
أدعو لك ليلا صباحا تسلمي

فيا جدتي في جنة الخلد انعمي

وكان حلما

بعد رحيل تيتا مباشرة كانت تلك هى فترة الاحلام الذهبية ..اذ لم يكن يمر يوما دون ان اراها فى منامى تحكى لى احوالها فى العالم الاخر وتصف لى مسكنها واتساعه..اسكنك الله فسيح جناته يا تيتا الحبيبةوجعل مثواك الجنة

الان تزورنى تيتا على فترات متباعدة ..ولكنها تاتى دائما لتخبرنى انها تعلم اخبارى واحوالى وكانها تعيش بيننا..

وكان حلما
كان يا ما كان قال المتكلم .... رحت لتيتا مره اسلم
قعدت شويه شفت عجايب.... تشوفها تقول يا سلام سلم
هو ّالميت يرجع تانى.... لحبايبه وكمان يتكلم

شفت بعيني تيتا جميلة .... قلت اكيد من حد دي حيلة
مديت ايدي مسكت ايديها.... لو حيلة دي تبقى مستحيلة

أبكى وتبكى .... لأ أوعى تمشى
تشد ايديها.اضغط عليها .... أنا حاسة بيها وأنا بتألم

ازاى رجعت وازاى ماشيه؟.... زى ما ماتت و كانت عايشة
اتارينى بحلم ولا كنت اعلم.... ومن الحلم ياما هتعلم
كان يا مكان قال المتكلم
شفت عجايب آل وغرايب
تشوفها تقول يا سلام سلم

وحشتينى

بجد بجد ادعو لتيتا بالرحمة

دى قصيدة كمان كنت كاتباها ..تقدروا تقولوا خواطر

وحشتيني
يا ولدى عليا وأنا من غير جد ولا جدة
حتى الأخيرة أخدها الموت في حدة
من غير كلام... في صمت تام....في 4 أيام ..راحت
وخدت معاها فرحة عيد ولبس جديد وحضن دافى في يوم العيد
بدون وداع ولا سلام راحت كده في صمت تام.....من غير كلام
وسابتنى أبكى عليها وأحكى
كانت ملاك حب و دفا..حضن الأمان ملاذ الخفا
دلع البنات في حضنها ..والحكمة كانت عندها
وسعدى والبركة منها
والعتقى و الانبيا و آذار وعين
علامة بارزة في قلبي تحكى ع اللي سكن في نني العين
وأول أحزانى حزن ملوش مثيل
طفل ضايع في ليل طويل....ملوش نهار
أعزى نفسي ف نفسي يعنى وللا أقول مواويل
يا تيتا وحشتينى
يا نور على جبيني
يا قلب كان وحاوينى
وحشتينى

رثاء

عندما يفقد الانسان شخصا عزيزا عليه ..لا يجد نفسه الا والالم قد اعتصر قلبه..لم اجرب معنى ان يبكى قلبى بعد ان تجف الموع من مقلتى ..او ان يعتصرنى الالم للدرجة التى وددت فيها ان اشق صدرى لربما استطعت استخراجه الا عندما توفيت جدتى سعاد محمد عامر (رحمها الله)

كنت فى الصف الثالث الثانوىعندما اختارها الله الى جواره..وكنت شديدة الارتباط بها..احسست وقتها بان الحياه يجدر بها ان تتوقف اذ لا معنى لها بدون من نحب ..ولكن كعادتها الحياة ..لم تتوقف امام احزاننا التى اخذت تتضائل حتى انى لاظنها اليوم اختفت

نعم ..لم يبقى من موت جدتى ذكرى حزينة فى قلبى ..فلم اعد افكر فى موتها بل فى حياتها التى عاشتها قبلا وكم كانت هذة الحياه بحلوها ومرها تملؤنى سعادة

لم تعد ذكرى(تيتا) تؤلمنى وتعتصر صدرى شوقا اليها

بل صارت تسعدنى وترضينى ..فابات ادعو لها بالرحمة وانا اعلم ان غاية ما تتمناه ويتمناه اى ميت ان تدعو له ذريته بالرحمة

رحمك الله يا جدتى الحبيبة انت وجميع اموات المسلمين

رثاء
يكاد شوقي إليك يدميني يا سعا والقلب محزون لم يأسه البكا
والقلب أبدا لن يكفكف دمعه هيهات الصبر والسلوان لمن ادعا
الموت راحة الله للأبرار لكنه وحشة للأحياء في الدنا
يا ذا الجلال يا رحمن في علاك الهمنى صبرا على قضاءك و رضا
و اوهبنى حبا يكن بديلا لحبها وان كنت اعلم انه لا عزا
فيا لقلبي المسكين قد عرف الزمان وحزنه سبلا إليه وسعا